طظ فينا كلنا

 

#طظ_فينا_كلنا
…..
عيب علينا وطظ فينا كلنا
اللفظ يشمل كل واحد مننا
واللي جاي يثبت كلامي
مافيش ملايكة وسطنا
طظ…..
ف اللي باع واللي خان
واللي سدوا كل الودان
واللي قالوا أحنا مالنا
الخطر بينه وبينا

كتييييييييييير بيبان
…..
واللي شاف..
محتاج وزوَّد إحتياجه
واللي خَبَّي..
الشوق وزود أشتياقه
واللي كان يقدر يعالج
وبخل علي غيره بعلاجه
بكرة هيعيد نفسه الزمان
….
واللي جابوا سيرة جيرانهم
والقاعدين بيحاكموا غيرهم
وكأن كل واحد مابينهم
بقي لغيره كما الدَّيان
…..
اللي مد إيديه لمسها
واللي ماشية راح عاكسها
واللي قلب الآيه وعكسها
وقال تستاهل اللي جرالها
ماتبصوا علي.. الفستان
…..
واللي غَّمى عينيه و عدّى
لما شاف حد محتاج مساعدة
وقال ياعمي وأنا مالي
خليني ماشي جنب الحيطان
..
واللي عذب واللي زوَّر
واللي غيَّر واللي حوَّر
واللي كان قادر ينور
شمعة تمحي ضلمة لكن
للأسف طلع جبان
…
واللي عاش العمر سلبي
جوه نفسه مستخبي
واللي خلوا الكون معَبي
حروب. وقلوب نسيت
طعم الأمان
….
واللي كَلّ حق اليتامي
واللي لابس توب يمامة
وهو من تحت العمامة
ياحفيظ كما التعبان
…
#كلمات_ناجح_ثروت