عجزت خلاص

 

والله وعجزت خلاص 

والشيب دب ف راسك

لا بقيت تزعل م الناس 

ولا حاطط حد ف راسك 

الوقت قصير جداً 

بتعد يومينك عد؟ 

وتبنى ف عمر أتهد؟ 

دا الباقى خلاص ع القد 

ويمكن مايكونشي مقاسك

مش كل الناس بتحبك 

ولا كل الناس كرهاك

وهتوجع ليه ف قلبك

ويا قلوب مش حساك 

ماتصدقشي أكاذيبهم 

وتكذب يوم إحساسك

دا الناس أبتيجي تروح

بتسيب ف القلب جروح 

فوق دا أنت قلبك مفتوح 

أعرف ساسك من راسك

ليه بتبور ف جناين

علشان أحساس مش باين 

جواك زحمة ومداين 

كاتمة ليه على أنفاسك

شمعتك ف إيدك قِيدها

حرر نفسك من قيدها 

شياطين الغير قَيَّدها 

أرضك جواك أوجدها 

مايفلحها غير فاسك 

….

#كلمات_ناجح_ثروت

 شرح الجناس التام 

..

شمعتك ف إيدك “قِيدها” (أشعلها أو نورها )

حرر نفسك من “قيدها”  ( قيودها )

شياطين الغير “قَيَّدها”  ( أربطها )